பெட்டாலிங் ஜெயா, மே.09-
தேசிய மகளிர் இரட்டையர் ஜோடியான பேர்லி டான்-எம். தினாவின் எதிர்காலம் நாளை அன்று மலேசிய பூப்பந்து சங்கத்தின் (BAM) வருடாந்திர பொதுக் கூட்டத்தில் முடிவு செய்யப்பட உள்ளது. அவ்விருவரும் தேசிய அணியில் இருந்து வெளியேறி தொழில்முறை வீராங்கனைகளாக மாறத் திட்டமிட்டுள்ளதாகப் பேச்சுக்கள் எழுந்துள்ளன.
எனினும் அம்முடிவு குறித்து ஒருமுறைக்கு இருமுறை யோசிக்குமாறு இளைஞர், விளையாட்டுத்துறை அமைச்சர் ஹான்னா இயோ அறிவுறுத்தியுள்ளார், மேலும் சுதந்திரப் பாதை பல சவால்களுடன் வரும் என அவர் எச்சரித்துள்ளார்.
பூப்பந்து வீரர் வீராங்கனைகளைப் பொறுத்தவரை, அவர்களுக்கு வழங்கப்படும் ஆதரவுகளை மட்டுமல்ல, முழு சுற்றுச்சூழல் அமைப்பையும், கிடைக்கும் ஆதரவையும் அவர்கள் கருத்தில் கொள்ள வேண்டும் என்று ஹான்னா கூறினார்.
அவர்கள் சங்கத்தின் ஒரு பகுதியாக இருக்கும்போது, அனைத்தும் கவனித்துக் கொள்ளப்படும். தொழில்முறை வீரர்களுக்கு, அவர்கள் ஒலிம்பிக்கிற்கு தகுதி பெற்றால், தேசிய விளையாட்டு கவுன்சில் (NSC) மூலம் அமைச்சு உதவி மானியங்களை வழங்குகிறது. ஆனால் அது பெரிய விஷயமல்ல.
அவர்கள் தொழில்முறை வீரர்களாக மாறியவுடன், பயிற்சியாளர்களுக்கு பணம் செலுத்துவதற்கு தங்கள் சொந்த நிதியைப் பெறுவது அவர்கள் பொறுப்பு. அதனால்தான் இந்தப் பாதை ஒவ்வொரு வீரருக்கும் ஏற்றது அல்ல எனத் தாம் கருதுவதாக ஹான்னா கருத்துரைத்தார்.
பிஏஎம்மை விட்டு வெளியேறும் முடிவை எடுப்பதற்கு முன்பு மிகவும் கவனமாக சிந்திக்குமாறு நான் அவர்களைக் கேட்டுக் கொள்கிறேன் என்றாரவர்.
பியர்லி டான் மற்றும் எம். தினா பிஏஎம்மை விட்டு வெளியேற திட்டமிட்டுள்ளதாக கடந்த ஒரு மாதமாக வதந்திகள் பரவி வருகின்றன. குறிப்பாக இருவரும் இன்னும் தேசிய அணியுடன் புதிய ஒப்பந்தங்களில் கையெழுத்திடவில்லை.
இருப்பினும், இதுவரை பிஏஎம்மோ அவர்கள் இருவரோ தங்கள் எதிர்காலம் குறித்து வாய் திறக்காமல் உள்ளனர். மேலும் இதுவரை எந்த பொது அறிக்கைகளையும் வெளியிடவில்லை.
