மிகப்பெரிய லஞ்ச ஊழலில் ஈடுபட்டதற்காக 12 ஆண்டுகள் சிறைத் தண்டனை விதிக்கப்பட்ட முன்னாள் பிரதமர் டத்தோஸ்ரீ நஜீப் துன் ரசாக்கின் தண்டனை காலத்தை 6 ஆண்டாக குறைக்கப்பட்டதற்கான காரணத்தை பிரதமர் டத்தோஸ்ரீ அன்வார் இப்ராஹிம் இன்று காலையில் விளக்கினார்.
மலேசியாவிற்கு 9 ஆண்டுகள் தலைமையேற்று, நாட்டிற்கு ஆற்றிய சேவை மற்றும் பங்களிப்புக்காக நஜீப்பின் தண்டனை காலத்தை மன்னிப்பு வாரியம் 6 ஆண்டுகளாக குறைத்துள்ளது என்று இன்று புத்ராஜெயாவில் பிரதமர் துறை பணியாளர்களின் மாதாந்திர பேரணியில் உரையாற்றுகையில் அன்வார் மேற்கண்டவாறு குறிப்பிட்டார்.
நாட்டின் ஆறாவது முன்னாள் பிரதமரான நஜீப், இப்போதுதான் தனது சிறைவாசத்தில் ஒன்றரை ஆண்டுகள் அனுபவித்துள்ளார் என்ற போதிலும் தனது தண்டனை காலம் தொடர்பில் பொது மன்னிப்பு கோருவதற்கு அனைத்து உரிமைகளையும் பெற்றுள்ளார் என்று அன்வார் விளக்கினார்.
அதேவேளையில் ஒருவர் தனது தண்டனை காலத்தை குறைப்பதற்கு மன்னிப்பு வாரியத்திடம் மேல்முறையீடு செய்வதற்கு முன்னதாக குறைந்த பட்சம் மூன்று ஆண்டுகள் சிறையில் இருந்திருக்க வேண்டும் என்று கூறப்படும் வாதத்தை அன்வார் மறுத்தார்.
ஒருவர் நாட்டிற்கு ஆற்றிய பங்களிப்பை கருத்தில் கொண்டு அவரின் தண்டனை காலத்தை குறைப்பது என்பது மாமன்னரின் பிரத்தியேக அதிகாரத்திற்கு உட்பட்டதாகும் என்று பிரதமர் தெளிவுபடுத்தினார்.
