ஷாலாம், பிப்ரவரி 24 –
வரும் திங்கட்கிழமை தொடங்கவிருக்கும் 15 ஆவது நாடாளுமன்றத்தின் மூன்றாவது கூட்டத்தொடர், மலேசிய ரிங்கிட்டின் வீழ்ச்சியை விவாதிக்கும் முக்கிய களமாக திகழும் என்று எதிர்பார்க்கப்படுகிறது.
கடந்த 26 ஆண்டுகளுக்கு பிறகு ரிங்கிட்டின் சரிவு, வரலாறு காணாத படுவீழ்ச்சியை எட்டியுள்ளதாக கூறப்படும் நிலையில் இந்த படுவீழ்ச்சிக்கான துல்லியமான காரணங்களை கேட்டு, எதிர்க்கட்சி எம்.பி.க்கள் சரமாரியாக கேள்விக் கணைகளால் துளைப்பதற்கான சாத்தியம் இருப்பதாக பொருளியல் ஆய்வாளர்கள் கூறுகின்றனர்.
நாட்டின் நாணய மதிப்பின் தொடர் சரிவு, பிரதமர் அன்வார் இப்ராஹிம் அரசாங்கத்தின் மீதான நம்பிக்கையைக் குறைத்து வருகிறது என்று முன்னாள் பிரதமர் டான்ஸ்ரீ முகைதின் யாசின் பகிரங்கமாக குற்றஞ்சாட்டியுள்ள வேளையில், இந்த சரிவுக்கு நிதி அமைச்சர் என்ற முறையில் அன்வாரே தார்மீக பொறுப்பேற்க வேண்டும் என்றும் வலியுறுத்தப்பட்டு வருகிறது.
குறிப்பாக கடந்த 26 ஆண்டுகளுக்கு மேலாக மலேசியாவில் போட்டிதன்மை இல்லாத காரணத்தினாலேயே ரிங்கிட்டின் செயல் திறன் மோசமடைமந்துள்ளது என்று கூறப்படுகிறது. அதேவேளையில் 1ம்.டி.பி நிதி ஊழலின் விளைவின் முக்கிய பகுதியாக ரிங்கிட் வீழ்ச்சியுற்றுள்ளது என்றும் குற்றஞ்சாட்டப்பட்டுள்ளது.
இதற்கு மேலாக, பொருளாதார சீர்திருத்தங்களை செய்வதில் பிரதமர் அன்வார் காட்டிய தாமதங்கள் ரிங்கிட்டின் சரிவுக்கு முக்கிய காரணம் என்றும் கூறப்படுகிறது. இதில் எது உண்மை என்பதை விடை காணும் சிறந்த களமாக வரும் திங்கட்கிழமை தொடங்கும் நாடாளுமன்றக்கூட்டத் தொடர் விளங்கும் என்று ஆய்வாளர்கள் கூறுகின்றனர்.
