போலி டத்தோஸ்ரீ பட்டம், வர்த்தகர் ​மீது குற்றச்சாட்டு

கோலாலம்பூர்,ஜன.5
இரண்டு ஆண்டுகளுக்கு முன்பு, பகாங்கிலிருந்து விருது பெற்றதாக கூறி, போலி டத்தோஸ்ரீ பட்டத்தை தனது பெயருக்கு முன் பயன்படுத்தி வந்த வர்த்தகர் ஒருவர், கோலாலம்பூர் செஷன்ஸ் ​நீதிமன்றத்தில் இன்று குற்றஞ்சாட்டப்பட்டள்ளார்.

வேறு தரப்பினரிடம் சட்டவிரோதமாக பெறப்பட்டதாக கூறப்படும் டத்தோஸ்ரீ பட்டத்தை பகாங் அரச பேராளரிடம் பெற்றதைப்போல் தோற்றத்தை ஏற்படுத்தி வந்த 54 வயது ஹசிமி அப்துல் ஹமிட் என்ற அந்த வர்த்தகர் ​நீதிபதி அஸ்ருல் டாருஸ் முன்னிலையில் நிறுத்தப்பட்டு, குற்றச்சாட்டு வாசிக்கப்பட்டது.

44 வயதுடைய மேம்பாட்டாளர் ஒருவருக்கு வழங்கிய கடிதத்தில் தனது பெயருக்கு முன்னாள் டத்தோஸ்ரீ பட்டத்தை அந்த வர்த்தகர் பயன்படுத்தியிருந்ததாக குற்றச்சாட்டில் தெரி​விக்கப்பட்டது. அவர் இக்குற்றத்தை கடந்த 2022 ஆம் ஆண்டு ஏப்ரல் முதல் தே​தி கோலாலம்பூர், Mont Kiara- வில் உள்ள ஒரு ஆடம்பர அடுக்குமாடி வீட்டில் புரிந்ததாக ​நீதிமன்றத்தில் தெரிவிக்கப்பட்டது.

குற்றவாளி என்று நி​ரூபிக்கப்பட்டால் 5 லட்சம் வெள்ளி வரை அபராதம் அல்லது 5 ஆண்டு வரை சிறை அல்லது இரண்டுமே விதிக்க வகை செய்யும் போலி விருது தடுப்பு குற்றவியல் சட்டம் 18 ஆவது பிரிவின் ​கீழ் அந்த வர்த்தகர் குற்றச்சாட்டை எதிர்நோக்கியுள்ளார்.